ගොවිතැනින් තොර සිංහලකමක් ගැන කතා කළ නොහැකි පරිදි ඒ එකිනෛක බැඳී ඇත. මුළු සිංහල සංස්කෘතියම පාහේ ගොවිතැන සමග බැඳුනේ වෙයි. අපේ ගොවිතැන පිරිහීම සිංහල සංස්කෘතිය පිරිහීමටත් අවසානයේ ජාතිය පිරිහීමටත් හේතුවෙයි.

Preview

ලංකා ඉතිහාසය



Powered by දහම් විල


Powered by දහම් විල


Powered by දහම් විල


Share this page
Powered by දහම් විල

කොළඹ වහල් දූපත


එදා අද කොළඹ
වහල් දූපත ලෙස සිංහල වහරට ගැණුන ‘‘ස්ලේව් අයිලන්ඞ්’’ හි මෙයට සියවස් තුන හතරකට පෙර කාපිරින් රඳවා සිටි පෙදෙසකි. වර්තමාන කොළඹ දෙක ලෙස හඳුන්වන කොම්පඤ්ඤවීදියට අයත් ප‍්‍රදේශයේ මෙම වහල් දූපත තිබුණා යැයි සැලකේ.
ආචාර්ය කේ.ඞී. පරණවිතාන මහතා පවසන පරිදි කොළඹ ජනප‍්‍රියම නම හා ස්ථානයත් මේ කොම්පඤ්ඤ වීදියයි. පසු කලෙකදී රෝහල් සමුපකාර, කාර්යාලය, කුරුඳුවගා, ආගමික ස්ථාන, ගුවන් හා යුද හමුදා කඳවුරු, වෙළෙඳ ව්‍යාපාරික ආයතන රාශියක්  කොම්පඤ්ඤවීදියේ පිහිටා ඇත.
ඇෆ්ගන් ජාතිකයන් බහුලව සිටි නිසා ඇෆ්ගන් ටවුම ලෙසත්, කාපිරි ජාතිකයන් සිටි නිසා කාපිරි නගරය ලෙසත්, මැලේ ජාතිකයන් සිටි නිසා මැලේ නගරය ලෙසත් විටින් විට හැඳින්වූ කොම්පඤ්ඤවීදිය ඇතැම් විට දී ‘‘බේරේ ටවුන්’’ ලෙසද ඇතැම් ඉංග‍්‍රීසි හා සිංහල ලේඛනවල දක්වා ඇත.
කොම්පඤ්ඤ වීදියට වහල් දූපත යන නම හැදුණු ආකාරය ගැන ඇත්තේ මෙවන් කතාවකි. 1630 දී පමණ පෘතුගීසින් විසින් ඉන්දියාවේ සිට මෙරටට රැුගෙන එන ලද කාපිරි ජාතිකයන් සිටි නිසා වහල් දූපත ලෙස නම් වූ බව කියැවේ. ඉන්දියාවේ ගෝව ප‍්‍රදේශයේ සිට මලබාර් වරායෙන් මෙම කාපිරි පිරිස් මෙරටට ගෙන්වා ඇත්තේ වහල් සේවයේ යෙදවීමටය. ලෝකයේ බොහෝ පෘතුගීසි යටත් විජිත වල මෙම අප‍්‍රිකානු කාපිරි ජාතිකයන් වහල් සේවයට ගෙන සේවයේ යොදවා ඇත.
ඇතැම්විට වෙළෙඳ භාණ්ඩ ලෙසත්, සොල්දාදුවන් ලෙසත්, කඳවුරු සහයකයන් ලෙසත්, ද්‍රව්‍ය ප‍්‍රවාහකයන් ලෙසත්, මෙම අප‍්‍රිකානුවන්ව සුදු ජාතිකයන් විසින් යොදවා ගත් බව සඳහන්ය. මෙලෙස යොදා ගත්තේ මෙම පිරිස් අයිතිව සිටි ස්වාමිවරුන්ට මුදල් ගෙවා බවද පැවසේ.
ස්වභාවයෙන්ම සැහැසි ජාතියක් වූ නිසා මොවුන්ගේ විශාල තොල් යා වන පරිදි යකඩ ඉබ්බන් දමා අත්වලට මාංචු සහිත යකඩ දම්වැල් දමා ඇතැම් විට මෙරට සේවයේ යොදවා තිබී ඇත. ඒ ඔවුන් ඇතැම්විට මිනිසුන් සපා මරා දමනු ඇතැයි යන බිය නිසාය. මන්දයත් මෙම කාපිරි ජාතිකයන් මිනී මස් බුදින්නන් ලෙස ඇතැම් රටවල ප‍්‍රචලිතව සිටි නිසාය.
කෙසේ හෝ මෙරටට ගෙනා කාපිරි පිරිස් පෘතුගීසීන්ගේ නොයෙක් වගා බිම්වල, ගෘහ සේවයේ යොදවා තිබුණි. පෘතුගීසීන් පමණක් නොව ලන්දේසීන් ද මෙම පිරිස් වගා බිම්වල යොදවා ආහාර ද්‍රව්‍ය වගා මෙන්ම වීද වගා කරවූ බවත් සඳහන්ය. ඇතැම් යහපත් චර්යා දැක්වූ පිරිස් කොළඹ රෝහලේ සාත්තු සේවයට ද යෙදවිණි.
18 වැනි ශතවර්ෂයේ දී පමණ මෙම කාපිරින්ගේ කැරැල්ලක් හටගෙන ඇත. එහිදී පාරවල් දෙපස ගොඩ නැගිලිවලට හානි පමුණුවමින් මෙම කැරැල්ල පැතිර ගොස් තිබේ. මොවුන් ඉතා ප‍්‍රචණ්ඩ අයුරින් එහිදී හැසිරී සිටි බවද සඳහන්ය.
එම කැරැල්ලේදි බැරැන්ට් වැන්ඩර් ස්ටොන්ස් නම් පිස්කල්වරයා හා ඔහුගේ බිරිඳ නිදි යහනේදීම කිරිච්චියකින් ඇණ මරා දමා ඇත.
කෙසේ හෝ වැන්ඩර් පිස්කල්ගේ නිවසේ සේවය කළ එම කාපිරි ජාතිකයා මිනී මැරුමට පෙර ඔවුන්ගේ නිදි යහනයට සැඟවී සිට ඔවුන් නින්දට යනතුරු බලා සිටි බවත් එවක මූලාශ‍්‍රවල ලියැවී ඇත.
එවකට ආණ්ඩුකාර අයිසැක් මේෆ්ට මෙම කැරැුල්ල දැඩිව මර්දනය කිරීමට පියවර ගත්තේය.
කැරැල්ල මැඩ පැවැත්වූ පසු සෑම දිනකම ඒ ඒ ආයතනවල, නිවාස වල වැඩ කළ කාපිරි ජනයා සියලූ දෙනාම ‘‘කාපිරි තැන්න’’ නම් ස්ථානයට කැඳවා ඇත. එහිදී සියලූම දෙනාගේ නම් අඬගසා අඩු අය කවුරුන්දැයි සොයා බැලිණි. ඉන් පසුව කොටුවේ කොටු බැමි අතර පටු පාරක් දිගේ කැඳවාගෙන සැලි පෝර්ට් යන ස්ථානයට ගෙනගොස් ඇත. සැලි පෝර්ට් යනු එවකට වැවේ තිබූ තොටුපළක් වීය.
එහිදී තිබූ බෝට්ටුවලට මෙම කාපිරින් පටවාගෙන ලංදේසි බසින් අයිජේ නමින් හැඳින්වූ කඩතොළු සහිත දිවයිනකට රැගෙන ගොස් ඇත. එම දිවයින අර්ධද්වීපයක් ලෙස තිබූ එකකි. එම අර්ධද්වීපයට කැඳවාගෙන ගිය මෙම පිරිස ලැයිම් හා මුඩුක්කු වල පදිංචි කරවා ඇත.
ඒ නිසාම සියවස් තුනක් තිස්සේම වහලූන්ගේ දූපත ලෙස මෙය හඳුන්වා ඇත. එය ‘‘වහලූන්ගේ දූපත’ ලෙස හංවඩු ගැසීම නිසා පසු කලෙක බොහෝ විචාරක දෝෂ දර්ශනයට ද ලක්ව ඇත. මෙයට වහල් දූපත ලෙස බි‍්‍රතාන්‍යයන් නම් කෙරූ බවද ඇතැම්හු සළකති.
එහෙත් වර්ෂ 1845 දී පමණ බි‍්‍රතාන්‍යයන්ම මෙරට වහල් සේවය තහනම් කර ඇති අතර එය නීතීගත කර ඇත. ලංකාවේ වහල් සේවය තහනම් කර දිගු කලකට පසු ලෝකයේ වහල්සේවය තහනම් කිරීමද විශේෂත්වයකි.
මුල්ම අවධියේදී රෝගී හා මහලූ අය මෙම දූපතේ රදවා තිබූ බව ඉංග‍්‍රීසි මූලාශ‍්‍ර වල සඳහන් ය.
1807 දී පමණ කාපිරි ජාතිකයන් හත්සියයක් පමණ මෙරට සිටි බව කෝඩිනර්ගේ වාර්තාවල සඳහන්ය. පුත්තලම, මඩකළපුව, ත‍්‍රිකුණාමලය ආදී ප‍්‍රදේශවල පසුකාලයක මෙම ජාතීන් සුළු වශයෙන් පැතිරී ගොස් ඇත.
ස්ලූයිස්කින් නම් කපිතාන්වරයකුගේ මන්දිරයක කාපිරි තූර්ය වාදක කණ්ඩායමක් සිටි බවද ඉතිහාස මූලාශ‍්‍රවල සඳහන්ය. ‘කපිර් වෙල්ඞ්ට්’ නම් විවෘත බිමක මෙම කාපිරි වෙනුවෙන් 1875 දී පමණ බිතාන්‍ය සොල්දාදුවන් බැරැක්ක ඉදි කරනු ලැබූ බව ද සඳහන්ය. එහිදී එක් මායිමක් ලෙස වත්මන් බේරේ වැවත්. අනෙක් පස ඇතුළු නගරයේ කොටු බැම්ම තිබූ බවද සඳහන්ය.
කෙසේ හෝ ලන්දේසි යුගයේ කොළඹ කොටුව නිර්මාණයට කාපිරි ජාතිකයන් යොදවා ගත් බවත් එකල කාපිරින් හාර දහසක් පමණ මෙරට සිටි බවත් ආණ්ඩුකාර ගොයන්ස්ගේ වාර්තාවක සඳහන්ය.
මුවෙන් චිකෝ නි සංගීත රාවයත් චතුරංග හෙවත් ක්වෝඩි‍්‍රල් නැටුමත් මෙම කාපිරින්ට ආවේණික වටිනා සංස්කෘතික දායාද බව ද සැලකේ.
කාපිරියකු විසින් මරා දැමුණු වෙරන්ට් වැන්ඩර් වරයාගේ නිවස පසු කලෙක භූතයන් හොල්මන් රජකළ නිවසක් බවද කට කතා පැතිරී ඇත. එම නිවසේ පසු කලෙක පදිංචි වූවන්ට වැඩිකලක් ගතකිරීමට තරම් හැකියාවක් නුවූ නිසා පසු කලෙක බි‍්‍රතාන්‍යයන් කෝපි ගබඩාවක් ඉදිකර ඇත. පසු කලෙක එම කෝපි ගබඩාව කඩා ඉවත් කර ඇති අතර අද එය තිබූ තැනක්වත් සොයාගත නොහැකිය.
කොළඹ කොටුවේ ලංකා බැංකු ගොඩනැගිල්ල අසල ඇචිලන් බැරැක්ක වලට යාබදව කපිර් වෙල්ඞ්ට් හෙවත් කාපිටි තැන්න තිබී ඇත.  ඕලන්ද බසින් කපිර් වෙල්ඞ්ට් යනු කාපිරින් පෙරට්ටුව සඳහා කැඳවූ ස්ථානය යැයි සැළකේ. එය පසුව කාපිරි මුඩුක්කුව ලෙස හඳුන්වා මෑත දශක දෙකකට පමණ පෙර කෝසල පටුමග ලෙස හඳුන්වා ඇත.
කාපිරින් ලංකාවට ගෙනෙනාවිට ලංකාවේ වහල් සේවය නොතිබුණි. එය ලංකාවාසීන්ට ආධුනික දෙයක් විය.
හත්ති කුච්චි සෙල් ලිපියේද ක‍්‍රි.ව. අට වැනි හා නව වැනි සියවස්වල මහා තිත්ථවල කාපිරි මිනිසුන් සිටි බව අරාබි වාර්තා වලද සඳහන් ව ඇත. ඇතැම් කාපිරින් විහාරස්ථානවල ඇබිත්ත තනතුරේද සිට ඇත.
1815 දී සිංහල මුස්ලිම් කෝලහල වලටද සම්බන්ධ වූ මෙම ප‍්‍රථම හා දෙවන ලෝක යුද සමයේදී යුද සේනාංකවලටද අපේරට වෙනුවෙන් යුද්ධයට සහභාගි වී ඇත. එපමණක්ද නොව රොබට් නොක්ස්ගේ වාර්තාවලට අනුව දෙවැනි රාජසිංහ රජු තම ශ්‍රී විභූතිය වර්ණවත් කිරීමට කාපිරි යුද සේනාංකයක්ද භාවිතා කර ඇත.
කීර්ති ශ්‍රී රාජසිංහ රජු ඉංග‍්‍රීසීන් විසින් අත් අඩංගුවට ගන්නා ලද විට රජුගේ සේනාවේ කාපිරින් දෙසීයක් සේවය කළ බව ජෝන් ඩොයිලිගේ වාර්තාවල සඳහන්ය.පිරිමි අය මෙලෙස යුද කටයුතුවල නිරත වූවද කාන්තාවන් ගෘහ සේවයේ ඉවුම් පිහුම් කටයුතු වලට සහභාගි වී ඇත.
කෙසේ වෙතත් විසිවන සියවසේදී පමණ ලංකාවේ පුවත්පත් වලින් මෙම කාපිරි ජනතාව සිටි ප‍්‍රදේශය හැඳින්වූ වහල් දූපත යන්නට එරෙහිව ප‍්‍රබල හඬක් නංවා ඇත. ලන්දේසි ඉංජිනේරුවරයකු වූ ‘ද බියර්’ සිහිවීමට කාපිරි ජනයා සිටි මෙම ප‍්‍රදේශයේ වැව බේරේ වැව ලෙස නම් කළ බැව් ඇතැම්හු පවසති. එලෙස බේරේ වැව කියා නම් කළානම් වහල් දූපත යන නම නොදා ‘‘බේරේ නගරය’’ ලෙස නම් නොකළේ ඇයි දැයි ඇතැම්හු ප‍්‍රශ්න කරති.
එහෙත් ද බියර් සිහිවීමට බේරේ වැව කියා නම් කිරීම පිළිගත නොහැකි බවද තවත් අය කියති. 1659 දී ලංදේසි ජාතික මිනින්දෝරු ඒඩි‍්‍රයන් ද ලීව් නම් නගර නිර්මාණකරු හා මිනින්දෝරුවා කොළඹ කොටුව නිර්මාණය කරන විට වත්මන් බේරේ වැවට කිසිදු නමක් නොතබා ජලාශය යැයි නම්කර ඇත. 1796 දී සිතියමක කොළඹ විල ලෙස නම් කර තිබුණද බේරේ වැව යන නම නිල වශයෙන් ලැබී ඇත්තේ 1927 වර්ෂයේ දීය.
කෙසේ හෝ වහල් දූපත ලෙස හැඳින්වූ මෙම ස්ලේව් අයිලන්ඞ් නම් ප‍්‍රදේශයේ කිසිදු දූපතක් මේතාක් හමුවී නොමැති බව ඉතිහාසඥයෝ මත පළකරති.
සියවස් දෙක තුනක් තිස්සේ කොළඹ නගරයේ ඉතාම මනස්කාන්ත නිසංසල දර්ශනයක් වූ බේරේ වැව පෘතුගීසි, ලංදේසි හා ඉංග‍්‍රීසින්ගේ අපමණ වර්ණනාවන්ට ලක්ව ඇත. කලක් එහි ඔරු පැදීම්. බිලීබෑම් වැනි තරඟ පැවැත්වූ බවද සඳහන්ය. එවන් සුන්දර දර්ශන වලට හිමිකම් කියූ බේරේ ජලාශය අද වන විට බොහෝ දෙනාගේ නාසය දුඟදින් හකුළුවන ස්ථානයක් බවට පත්ව ඇති බවද කිව යුතුමය.
විශේෂ ස්තූතිය.
පේරාදෙණි විශ්ව විද්‍යාලයේ ඉතිහාස අධ්‍යයනාංශයේ ජ්‍යෙෂ්ඨ කථිකාචාර්ය ආචාර්ය රෝහිත දසනායක මහතාට
සටහන හා ඡායාරූප - පුෂ්පා වීරසේකර
2012 අගෝස්තු මස 12 | ලංකාදීප කර්තෘ මණ්ඩලය
 එදා වහල් දූපතට විහාරස්ථානය පෙණුන අයුරු
 1905දී කොම්පඤ්ඤ වීදිය

අස්ගිරි ගෙඩිගේ රාජමහා විහාරය



විහාර මන්දිරයේ බුද්ධ ප්‍රතිමාව
ගම්පොළ රාජධානියේ රජ පැමිණි තුන්වැනි වික්‍රමබාහු මහ රජුගේ මෑණියන් වූ චන්ද්‍රවතී දේවිය සිහිපත්වීම සඳහා සෙංකඩගලපුර (මහනුවර) අස්ගිරි ගෙඩිගේ මහා විහාරය (ආදාහන මළුව) ඉදිකැරණු ලැබූ බව සඳහන් වේ.
දැනට මහනුවර ශ්‍රී දළදා මාලිගාව ආශ්‍රිතව ඇති විහාරස්ථාන අතර ඉපැරැණි විහාරය ලෙස මේ විහාරය සැලැකේ. ඉන්දියානු ආභාෂයෙන් නිර්මිත මකර තොරණ සහිත ගල් කැටයම් දර්ශනීය සභාවයෙන් විචිත්‍රවත් වේ.

ගෙඩිගේ විහාර මන්දිරය
මහින්දාගමනයත් සමඟ පළමුව ඉදිවූ මහා විහාර සඟ පරපුර තෙක් අස්ගිරි විහාර සංඝ පරම්පරාව ව්‍යාප්තවේ. එසේ සංඝ පරම්පරාවකට හිමිකම් කියන ගෙඩිගේ විහාරය ඉපැරැණි ඉතිහාසයකට හිමිකම් කියයි.
බුද්ධ වර්ෂ 2296 දී දුරුතු මස පුර පසළොස්වක් පොහෝදා අමාත්‍ය පිරිස පිරිවරා ගත් කීර්ති ශ්‍රී රාජසිංහ රජු අස්ගිරි මහා විහාරස්ථ ගෙඩිගේ විහාරයට පැමිණියේය.
එහිදී රජුගේ පූර්ණ දායකත්වය ඇතිව සියම් දේශයේ සිට වැඩම කැර වැඩ සිට අපවත්වී වදාළ සියම් උපාලි මහා තෙරුන්ගේ හා මල්වතු අස්ගිරි උභය මහා විහාරීය භික්ෂූන්ගේ ආශිර්වාද මධ්‍යයේ රන් පොතෙහිවූ පරිද්දෙන් දිගින් රියන් තිස් දෙකක් හා පළලින් රියන් විසි අටක් වූ අස්ගිරි මහා විහාරස්ථ ප්‍රථම උපෝසථ පෝය සීමා මාලකය පිහිටුවන ලදී.
ඉතිහාස පුරාවිද්‍යාත්මක වටිනාකමකින් පෝෂණය ලත් අස්ගිරි ගෙඩිගේ විහාරය හා බැදුණු කතා රාශියක් ප්‍රචලිත වේ.

සියම් උපාලි මාහිමි ස්මාරකය හා බෝධි ගර්භය

සෙංකඩගල පුර රජ පැමිණි පළමුවන විමලධර්මසූරිය රජ දවස රත්නපුර කුරුවිට දෙල්ගමුව රාජ මහා විහාරයේ කුරහන්ගලේ වැඩ සිටි ශ්‍රී දන්ත ධාතුන් වහන්සේ මහනුවර ශ්‍රී දළදා මාලිගාවේ තැන්පත් කිරීමට පෙර අස්ගිරි ගෙඩිගේ විහාරයේ වැඩ විසීමට කටයුතු සිදුකළ බව පැවැසේ. ඉන් අනතුරුව ශ්‍රී දළදා මාලිගාවට වැඩම කැරවූ බව සඳහන්වේ.
එම අවස්ථාව සිහිපත් කැරවීම වස් වාර්ෂික දළදා පෙරහර අවසන් පෙරහරේ වැඩම කැරවනු ලබන පෙරහර කරඬුව මෙහි තැන්පත් කැර දවල් පෙරහර පිටත්වන තෙක් පුද පූජා පැවැත්වීම අස්ගිරි ගෙඩිගේ විහාරස්ථ සඟ පරපුර අඛණ්ඩව සිදු කරති. ඒ අනුව එම චාරිත්‍ර පුද පූජා තවමත් ඒ අයුරින්ම සිදු කැරේ.
මෙහි ඇති විහාරාංග මහනුවර යුගයේ නිර්මාණ ශෛලිය අනුගමනය කැර තිබේ. විශේෂයෙන් මෙහි විහාර මන්දිරයේ දර්ශනීය චිත්‍ර රැසකින් ඒකාලෝක වේ.

විහාරාධිකාරි වේඩරුවේ උපාලි නාහිමියෝ
බෝධි ගර්භය ද මගුල් මඩුවද වළාකුළු බැම්මද නව සංඝා වාසයද විහාර භූමියේ විද්‍යාමාන වේ. එහි විහාරාධිකාරී ධුරය ඓතිහාසික පොළොන්නරුව සොලොස්මස්ථානාධිපති ශාස්ත්‍රපති පණ්ඩිත වේඩරුවේ උපාලි නාහිමියෝ හොබවති.



කොළඹ ආරක්ෂාවට හැදු කොළඹ කොටුව

එදා අද කොළඹ
එදා කොළඹ ගැන කතා බහ කරනවිට පෘතුගීසි හා ලන්දේසි යුගවල කොළඹ පැවැති ආරක්ෂක විධි විධාන ගැන සොයා බැලීමට අපි මේ සතියේ තීරණය කළෙමු.
මෙරටට ප‍්‍රථම වරට පැමිණි යුරෝපීය ජාතිය වූ පෘතුගීසීහු ස්වකීය ශක්තියෙන් තනාගත් කොළඹ බළකොටුව සතුරන්ගෙන් රැක ගැනීමටද ඒ සා ශක්තියක් හා යුද ශිල්ප දැක්වූහ.
ආහාර හිඟයෙන් ශරීර ශක්තිය දියව ගියද චිත්ත ශක්තිය නිසා ලන්දේසීන් සමඟ හත් මාසයක් යුද වැදෙමින් තම බළකොටුව රැක්මට එදා පෘතුගීසි සෙබළු 90 දෙනෙක් සමත්වූහ. ඒ අතරතුරදි කොටුවේ සිටි බල්ලන්, බළලූන්, මීයන් ආදී සතුන්ගෙන් තම ආහාර වේල පිරිමසා ගැන්මටද පෘතුගීසින්ට සිදුව ඇත. ඔවුන් ඒ සියලූ ශක්තිය ගත්තේ පෙරදිග ධාන්‍යාගාරයේ ආර්ථික මර්මස්ථානය වූ කොළඹ බළකොටුව රැක ගැන්මටය.
එවන්වූ බල කොටුවේ ඔවුන් එදා පවත්වාගන ගිය ආරක්ෂක විධි විධාන කවරේදැයි මීළඟට විමසා බලමු.
පෘතුගීසි පාලන සමයේදී එවකට තිබූ ප‍්‍රාදේශීය රාජධානිවලින් එල්ලවන අභියෝග නිසාම කොළඹ ප‍්‍රදේශයේ විශාල භූමි ප‍්‍රදේශයක බළකොටුවක් නිර්මාණය කරන ලදී.
එහි මුහුද දෙසට තිබූ කොටස එනම් ”ගල්බොක්ක” ලෙස හඳුන්වන ප‍්‍රදේශය ගල් පවුවකින් වැසී තිබූ නිසා ස්වභාවික රැකවරණය ලැබී තිබිණි. මුහුදු බොක්කේ ගැටිය වටා ඉදිව තිබූ උතුරු බැම්මේ යුද අට්ටාල පහක් ඉදිකර තිබිණි.
නව දිය කඩනය ආරම්භ වන ස්ථානයේ කෙළවරක ශාන්ත කෲස් හෙවත් වෝටර් කාසල්ද අනෙක් කෙළවර ශාන්ත ජො ආ ඕ හෙවත් ශාන්ත ජෝන් අට්ටාලයද, කියුරාංක් හෙවත් කවුරුස් ලෙස ද හැඳින්වූ ශාන්ත ෆ්රැන්සිස් සේවියර් යුද අට්ටාලයද පිහිටියේය.
මේ හැර ශාන්ත ස්ටීවන් ශාන්ත සෙබස්තියන් හා මැඩි‍්‍රඩියෝස් ලෙස තවත් යුද අට්ටාල තුනක්ද පිිහිටා තිබිණි.
ගොඩබිම් ප‍්‍රදේශ නිතරම පාහේ ආක‍්‍රමණයන්ට ලක්වූ නිසාම දැවැන්ත බැම්මක් ඉදිකර ඒ වටා ආරක්ෂාව තර කර තිබිණි.
කොටුවේ නැගෙනහිර සීමාව දිගේ ගලා ගිය දිය අගලකින්ද නැගෙනහිර දොරටුවට අමතර ආරක්ෂාවක් ලැබිණි.
කොටුවේ දකුණු දිශාව ආරක්ෂාවට ලැගෝප් යන පෘතුගීසි නමින් හැඳින්වූ කිඹුලන්ගෙන් පිරි ජල තටාකයක් පැවතිණි. එයින් ලැබෙන ආරක්ෂාව මඳ හෙයින් දෝ නාවික බළ ඇණි භාර සෝනි ජේකබ් ලියන්ස් ඇතුළු යුද බළ ඇණි දෙකක සොල්දාදුවන් මුරට යොදා තිබුණි. ඊටත් අමතරව චැංපොන් නම් චීන බෝට්ටුද ආරක්ෂාව පිණිස යොදා ගැනීමට පෘතුගීසීන් කටයුතු කර තිබිණි.
මේ ලෙස ආරක්ෂාවුණු කොළඹ ඇතුළත කොටුව බාහිර ආක‍්‍රමණවලට කොතෙකුත් ලක්වුවද කිසිදු දිනක සතුරන් අතට පත් නොකරන්නට එදා සිටි පෘතුගීසිහු වග බලා ගත්හ.
1655 සැප්තැම්බර් මාසයේදී පමණ නැව් දහසයක නැගී සෙබළුන් 3000ක් පිරිවරාගෙන පැමිණි ලන්දේසි ජාතික හර් ජෙරාඞ් හල්ෆට් නම් යුද සෙනෙවියා ගාලූ වරායට පැමිණෙන තෙක්ම පෘතුගීසීන්ගේ බළකොටුවල ආරක්ෂාවට එතරම් තර්ජනයක් නොවීය.
එවකට උඩරට රාජ්‍යය පාලනය කළ සෙනරත් රජුගේ හා දෝන කතිරිනා හෙවත් කුසුමාසන දේවියගේ පුතුවන අස්ථාන කුමරු හෙවත් දෙවැනි රාජසිංහ රජතුමා සමඟ හල්ෆට් සෙනෙවියා එදා මිත‍්‍ර සන්ධානයක් ගොඩනගා ගත්තේ මෙරටින් පෘතුගීසින් පන්නා දැමීමටය. ”ඉඟුරු දී මිරිස් ගත්තා” යැයි පසුව ප‍්‍රචලිත වූයේද දෙවැනි රාජසිංහ රජුගේ එම තීරණයත් සමඟය.
කෙසේ හෝ ඉන් මසකට පමණ පසු ලන්දේසි සේනා කොළඹ දක්වා පැමිණියේ කොටුවට පහර දී එහි බලය අල්ලා ගැනීමටය.
මේ බැව් සැළවූ පෘතුගීසින් කළේ තම කොටුව තුළ සිටි නිත්‍ය හමුදා සෙබළුන් 500 දෙනා ඇතුළු 1300 ක සේනාවක් සූදානම් කිරීමය. එම සේනාවට සිංහල පවුල්වලින් ආවාහ විවාහ වී පැවතුණු පවුල්වල තරුණයන් 300ක්ද අයත්ව ඇත. කෙසේ හෝ එම සෙබළු තම කොටුවේ ප‍්‍රධාන දොරටු 03 ඉබියතුරුලා වසා දමා යුද අට්ටාලවලට වී ලන්දේසීන් එනතුරු බලා සිටියහ.
මෙඞ් ඔෆ් කුයිසන් නම් ලන්දේසි නැව මුහුදෙන් ආරක්ෂාව ලැබූ කොටුවේ වෝටර් කාසල් දොරටුව බිඳීමේ අරමුණින් කාලතුවක්කු ප‍්‍රහාරයන් දියත් කරගන දොරටුව සමීපයටම ආවත් එහි රැකවල්ලා සිටි පෘතුගීසිහු එය විනාශ කළහ. එයට වූ විනාශය දුටු අනිකුත් ලන්දේසි නැව් ගැඹුරු මුහුදේ නැංගුරම්ලා බලා සිටි බවද ලන්දේසි හා පෘතුගීසි මූලාශ‍්‍රවල සඳහන්ය.
කපිතාන් කයිලන් බර්ග් හා මේජර් වොන් වැන්ඩර් ලෑන් යන ලන්දේසි යුද හමුදා නිලධාරීන් ප‍්‍රමුඛ සේනාවන් කියුරාස් හා ශාන්ත ජොආ ඕ යුද අට්ටාලවලට පහර දුන්න ද ඒවා යටත් කරගත නොහැකි විය.
ඒ අතර හර්ෆට් සෙනෙවි තෙමේ සෙබළුන් අටසිය දෙනකු පිරිවරා පුර්ටේ රෙයිනා හෙවත් බිසෝ දොරටුව ලෙස හැඳින්වූ නැගෙනහිර දොරටුව බිඳීමට වෑයම් කළේය. රද්ජුවා හෙවත් කයිමන් දොරටුව ලෙස වහරේ පැවතුණු එම නැගෙනහිර දොරටුවේ බලය අල්ලාගෙන බැම්මට ඉනිමං තබා කොටුවට ඇතුළුවීමට ද ලන්දේසීහු උත්සාහ කළහ.
එහෙත් යුද ශක්තියෙන් හෝ සේනා බලයෙන් ලන්දේසි හමුදාව හා සම තත්ත්වයක නොවුවද පෘතුගීසිහු තම බළකොටුව රැක්මට දිවි පරදුවට තබා සටන් කළහ. ඒ නිසාම පුරා මාස හතක් පමණ කොටුව තුළ සිරව සිටිය ද සිය කොටුවට සතුරාට ඇතුළුවීමට ඉඩක් නොදීමට එදා පෘතුගීසීහු කි‍්‍රයා කළහ. සවි ශක්තිමත් ලෙස බළකොටුවේ ද්වාර මෙන්ම ප‍්‍රාකාරද ඉදිකර තිබීමත් එයට හේතුවී ඇත.
කෙසේ වෙතත් පෘතුගීසි මූලාශ‍්‍ර රැසකට යස අගේට විස්තර කර ඇති පෘතුගීසින්ගේ බළකොටුවේ නැගෙනහිර දොරටුව හා බැම්ම ලන්දේසීන්ගේ කාල තුවක්කුවල බල මහිමයෙන් කුඩා ගල් කැබලි ගොඩකට කැඞී තිබුණි.
1655 ඔක්තෝබර්වල පරංගීන්ට එරෙහිව  ඕලන්දක්කාරයන් කොළඹදී ඇවිලවූ සටනේ ලන්දේසීන්ට ජයක් අත්කර ගන්නට ලැබුණේ ඉන් මාස හතකට පසු එනම් මැයි හත් වැනිදාය. එදා ශාන්ත ජෝන් හෙවත් ශාන්ත ජෝ ආ ඕ දොරටුවේ බලය ලන්දේසීන් අල්ලා ගත්තේ තම සේනාංකයේ සෙබළුන් හාරසියයකගේ ජීවිත කැප කරමිනි. ඊටත් වඩා පිරිසක් තුවාලකරුවන් බවට ද පත් කර ගනිමිනි.
ඒතරම් විනාශයක් ලන්දේසීන්ට අත්කර දුන් පෘතුගීසි හමුදාවේ සෙබළුන් කී දෙනෙක් එවකට ජීවත්ව සිටියාදැයි ලන්දෙසීන් දැන ගත්තේ ඉන් දින පහකට පසුවය.
ඒ කඩු කස්තාන තුවක්කු එල්ලාගෙන වැරැහිලි ඇඳුම්වලින් යුක්තවූ වැහැරී ගිය සිරුරෙන් හැරමිටි ගසමින් ආ සෙබළුන් හා තවත් පෘතුගීසි ජාතිකයන් අනූ දෙනෙක් මැයි දොළොස් වැනි දින යටත් වීමට පැමිණීමෙන් අනතුරුවය.
සාගතයෙන් මෙන්ම රෝග පීඩාවෙන්ද පෙළෙමින් සිටි මෙම පෘතුගීසීන්ගේ විලාසය දුටු ලන්දේසීන් පවා විස්මයට පත්ව ඇත. කෙසේ හෝ ලන්දේසීන්ට යටත්වීමට මෙලෙස පැමිණියේ කොටුවේ රැක්මට කළ හැකි කිසිවක්ම නුවූ තැනය.
සෞඛ්‍යයෙනුත් ශරීර ශක්තියෙනුත් සාගතයෙනුත් දරුණු ලෙස පීඩාවට පත්ව සිටි පෘතුගීසීන් පරාජය භාර නොගෙන මුළු නගරයම පුපුරුවා හරිමින් දිවි නසා ගන්නටද වෑයම් කර ඇත. එහෙත් නගරය පිපිරවීමට අවි ආයුධ පිරවීමට තරම්වත් වෙඩි බෙහෙත් නුවූ තැන මොවුන් මෙසේ සටන් නවතා යටත්වීමට පැමිණ ඇත.
පරංගීන් සිටි බළකොටු උඩරට රජුට කරදෙන පොරොන්දුව මත ලන්දේසීන් යුද වැදුනද යුද්ධයෙන් මිය ගිය සෙබළුන්ගේත් විනාශවූ යුද ආම්පන්න හා ඊට වැයවූ මුදලටත් සරිලනසේ රජුගෙන් ඊට අදාළ වන්දිය ඔවුහු ඉල්ලා සිටියහ. මෙයින් ෂෂ රාජසිංහ රජු දරුණු ලෙස කිපුණු බැව් දත් ලන්දේසීහු කොළඹ නගරයේ ඇතුළත පෘතුගීසින්ටද වඩා සවිමත් බළ කොටුවක් නිර්මාණය කළෝය.
පෘතුගීසින්ගේ කොටුවට වඩා ඉතාමත් කුඩා භූමි ප‍්‍රමාණයක මෙම කොටුව ඉදිවිණි. කොටින්ම එය පෘතුගීසීන්ගේ බළකොටුවෙන් තුනෙන් එකක් තරම්වත් නොවීය. ශක්තිමත් කොටු බැමි හා ගැඹුරු දිය අගල්ද එහි වටා ඉදිවූයේය.
එම බළකොටුවේ නැගෙනහිර මායිමේ ලෙයිඩන්, ඩෙල්ප්ට්, හූන් යන යුද අට්ටාලත් දකුණු මායිමේ රොටර් ඩෑම්, මිඞ්ල් බර්ග්, ක්ලිපන්බර්ග් හා එන් කුයිසන් යන යුද අට්ටාලත් බටහිර කොටසේ බ්‍රෙයිල් හා ඇම්ස්ටර්ඩෑම් යන යුද අට්ටාලත් ඉදිවීය.
වෝටර් පාස් හා සීබර්ග් යන යුද අට්ටාලද මෙයට අමතරව කොටුවේ ආරක්ෂාවට යොදා ගැනිණි. ”කාසල්” ලෙස පොදුවේ හැඳින්වූ කොටුවේ නැගෙනහිර මායිමේ තිබූ හිස් තැනිතලා භූමියක් වූ බෆලෝස් ලේන් හෙවත් මී හරක් තැන්නද ආරක්ෂාවට යොදා ගත්තේ වතර බැහැර කිරීමට තැනූ සොරොව්වකින් එය වතුරෙන් යට කිරීමට හැකිවන පරිදි නිර්මාණය කිරීමෙනි. ”බියර්” නම් ඉංජිනේරුවකු විසින් මෙම දිය අගල් හා ආරක්ෂක ජලාශ ක‍්‍රමයන් ඉදිකළා යැයි සලකනු ලැබීය. ඇතැම්හු මේ ”බියර්” ඉංජිනේරුවා සිහිවීමට එම වැව ”බේරේ වැව” ලෙස නම් කර ඇතැයිද කියති.
කෙසේ හෝ ඉහත යුද අට්ටාලවලට අමතරව මහ මුහුද හෝ වැව අසු නොවූ ස්ථානවල ගැඹුරු දිය අගල්ද තැනීමට  ඕලන්දකාරයෝ එදා පියවර ගත්හ.
කොටුවේ සිට කැලණිගඟ දක්වා ඇළක් සාදා එයද බළකොටුවේ ආරක්ෂාවට යොදා ගති.  ඕලන්ද ඇළ හෙවත් ”කැනල් රොව්” ලෙස නම් වූයේ මේ ඇළය. එහි වපසරිය එදාට වඩා අද බෙහෙවින් පටුවී ඇත.
1550 වනවිට තාප්පවලින් වටව තිබූ පෘතුගීසි බළකොටුව ලන්දේසීන් සමඟ කළ සටනේදී විනාශව ගිය නිසා එය ගොඩ නංවන්නට ලන්දේසීන්ට බොහෝ කාලයක් ගතවීය. කැඞී බිඳී සුනු විසුනු වූ නැගෙනහිර කොටු පවුර ඉදිකිරීමට පමණක් විසි වසරකටත් වඩා වැඩි කාලයක් ලන්දේසීන්ට ගතව ඇත. අති විශාල ධනස්කන්ධයක් ඊට වැයවූ නිසාම  ඕලන්දයේ පාලකයන් කොටුවේ භූමි ප‍්‍රමාණය සීමා කිරීමට අණ දී ඇත.
ඒ නිසාම වර්තමාන කොටුවට සමාන භූමි කොටසක ලන්දේසි බළකොටුව ඉදිව ඇත. කෙසේ හෝ ලන්දේසීන්ගේ මේ සවිමත් බළකොටුව බිඳ පැමිණි එක් අයෙක් ගැන පමණක් එකල ලන්දේසීන් තම දෛනික වැදගත් සිදුවීම් සනිටුහන් කළ කොළඹ නිල වාර්තාව හි සඳහන්ය.ඒ 1751 නොවැම්බර් 27 දින පෙරවරු දෙකට පමණ කොටු බැම්මක් බිඳගෙන බේරේ වැවෙන් පිහිනා රොටර්ඩ‍්‍රෑම් අට්ටාලය විනාශ කළ දළ ඇතෙකිය. මෙම ඇතා රොටර් ඩෑම්හි සේවය කළ සෙබළුන් තුන් දෙනෙකුගෙන් එකෙකු මරා දමා තවකකුගේ අතපය බිඳ දැමූ බවද කොළඹ නිල වාර්තාවේ මැනවින් විස්තර කර ඇත.
18 වැනි සියවස වෙද්දී මෙම බළකොටුවේ වපසරිය වර්ග සැතපුමක් දක්වා අඩුවී තිබිණි. 1807 දී සන්නද්ධ තුවක්කු හතක් හා යෝධ ආධාරක කාල තුවක්කු 30 ක්ද බළකොටුවේ ආරක්ෂාවට යොදා තිබුණි.
1871 වනවිට ඝනකම් බිත්ති සහිතව දිගු උස ප‍්‍රාකාරවලින් සමන්විතව තිබූ බළකොටුවේ තාප්ප බොහෝමයක් කඩා දමා තිබිණි.
1796 පෙබරවාරි දහසය වැනි දින කොළඹ කොටුවේ බලය ලන්දේසීන් විසින් ඉංගී‍්‍රසීන්ට පවරා යන්නේ දෛවෝපගත සිද්ධියක් පරිද්දෙනි. මන්දයත් එයට වසර 140 පෙර පෘතුගීසීන්ගෙන් කොටුවේ බලය උදුරා ගත්තාටත් වඩා නින්දිත ලෙසය.
රටේ සෙසු  ඕලන්ද බළකොටු ක‍්‍රමයෙන් අල්ලාගන එන බි‍්‍රතාන්‍යයන්ට සටනක් නුදුන් මේ  ඕලන්දක්කාරයෝ මැලේ සෙපොධිවරුන් හා එක්ව පලා ගියහ. හූන් හා ඩෙල්ප්ට් යුද අට්ටාල අතර ඇති නැගෙනහිර දොරටුවෙන් එලෙස ගියේ කැලණි ගං මෝය අසල ඒ වනවිටත් නැංගුරම් ලා තිබූ බි‍්‍රතාන්‍ය ජාතික ආර්. එන්. ගාඞ්නර්ගේ යුද නැව් හා කර්නල් ජේම්ස් ස්ටුවට්ගේ යුද සේනාංක කොළඹ කොටුව වැටලූ පසුය. එදා නැගෙනහිර මළුව ලෙස හැඳින්වූ අද ලෝටස් මාවත ප‍්‍රදේශයේදී ලන්දේසීහු තම කඩු හැර අනිකුත් අවි ආයුධ බි‍්‍රතාන්‍යයන්ට භාර දුන්නෝය.
එදා ලන්දේසීන්ගේ යුද අට්ටාල තිබූ තැන්වල අද පවතින්නේ මොනවා දැයි අපි ඊළඟට විමසා බලමු.
නැගෙනහිර මායිමේ තිබූ හුන් අට්ටාලය අද ට‍්‍රාන්ස්වර්ක් ගොඩනැගිල්ල පිහිටි තැන පැවතිණි. එදා ඩෙල්ෆ්ට් අට්ටාලය පිහිටියේ අද ”මේන් ස්ටි‍්‍රට් හෙවත් කෙළින් වීථිය හා ගෆුර් ගොඩනැගිලි පිහිටි තැනය. ලෙයිඩන් යුද අට්ටාලය අද ගෆුර් ගොඩනැගිල්ල පිටුපස පිහිටියේය. වරායට යාබද ”ලේඩන් බැස්ටියන්” මාවත ඒ නෂ්ටාවශේෂයයි.
දකුණු මායිමේ එදා තිබූ යුද අට්ටාලය වූ එචිලන් බැරැුක්ක කෙළවර පිහිටි රොටර් ඩෑම් පිහිටියේ අද රීගල් සිනමාහල තිබූ තැනය. මිඞ්ල් බර්ග් තිබුණේ රැජිණ වීදියේ දකුණු කෙළවර ගාලූ මුවදොර පිටිය පෙනෙන පරිදිය. කොඩිගහ වීදියේ එන්කුයිසන් පිහිටියේය. රේගුවේ ප‍්‍රධාන දොරටුව අසළ ඇම්ස්ටර්ඩෑම් පිහිටා තිබිණි.
(විශේෂ ස්තුතිය - පේරාදෙණිය විශ්ව විද්‍යාලයේ කථිකාචාර්ය රෝහිත දසනායක මහතාට)
2012 ජූලි මස 29 | ලංකාදීප කර්තෘ මණ්ඩලය
 කයිමන් දොරටුව තිබෙන ප‍්‍රදේශයේ ට‍්‍රෑම් කාර් ගිය හැටි
 එදා ඩෙල්ෆ්ට් යුද අට්ටාලය තිබූ තැන මහ වීදිය පසු කලෙක දිස් වූ අයුරු.
 පැරැණි කොටුවේ ඕලන්ද ඇළ එදා තිබූ අයුරු.
 එදා ශාන්ත සෙබස්තියන් ඇළ තිබූ අයුරු.
 ශාන්ත ජෝන් යුද අට්ටාලය තිබූ තැන ශාන්ත ජෝන් මාළු වෙළෙඳ පොළ තිබූ ගොඩනැගිල්ල අද
 අද ශාන්ත ජෝන් වීදිය දිස්වන අයුරු.
එදා රොටර්ඩෑම් යුද අට්ටාලය තිබූ තැන අද ඇති රීගල් සිනමා හල